એપલનો પહેલો ફોલ્ડેબલ આઇફોન ખરીદવો અઘરો બનશે, શરૂઆતમાં લિમિટેડ સ્ટોક હોવાથી ઇંતેજારી વધશે

ગ્લોબલ ટેક જાયન્ટ એપલ (Apple) ના ચાહકો માટે એક રોમાંચક અને દિલધડક સમાચાર સામે આવ્યા છે. વર્ષોની રાહ જોવડાવ્યા બાદ આખરે એપલ તેના પહેલા આઇફોન ફોલ્ડ એટલે કે "આઇફોન અલ્ટ્રા" (iPhone Ultra) પરથી પડદો ઉઠાવવા જઈ રહ્યું છે. જોકે, આ ખુશીની સાથે સ્માર્ટફોન લવર્સ માટે એક મોટો પડકાર પણ આવી રહ્યો છે. પ્રતિષ્ઠિત ગ્લોબલ ટેક એનાલિસ્ટ મિંગ-ચી કુઓના લેટેસ્ટ રિપોર્ટ અનુસાર, આ ક્રાંતિકારી ફોલ્ડેબલ આઇફોનને ખરીદવો શરૂઆતમાં 'લોઢાના ચણા ચાવવા' જેવો સાબિત થઈ શકે છે.

એપલ પોતાની પ્રીમિયમ ક્વોલિટી અને અનોખી ડિઝાઇન માટે જાણીતું છે, પરંતુ જટિલ ડિસ્પ્લે ટેકનોલોજી અને હાર્ડવેરના કડક માપદંડોને કારણે આ આઇફોનનો પ્રારંભિક સ્ટોક (Stock) અત્યંત મર્યાદિત એટલે કે લિમિટેડ રહેવાની પ્રબળ આશંકા છે.

શા માટે શરૂઆતમાં આઇફોન ફોલ્ડ મેળવવો મુશ્કેલ બનશે?

ટેક નિષ્ણાતોના મતે, એપલ પોતાની સ્ક્રીન પરની ગડી (Crease) ને સંપૂર્ણપણે અદ્રશ્ય કરવા માટે અત્યંત મોંઘી અને અદ્યતન ટેકનોલોજીનો ઉપયોગ કરી રહ્યું છે. આ જટિલ મેન્યુફેક્ચરિંગ પ્રક્રિયાના કારણે પ્રોડક્શનની સ્પીડ ઘણી ધીમી છે.

2017 ના યાદગાર 'આઇફોન X' જેવો માહોલ ફરી સર્જાશે

ટેક જગતમાં ચર્ચા છે કે આ લોન્ચિંગ વખતે બિલકુલ ૨૦૧૭ જેવી સ્થિતિ ઊભી થશે. જ્યારે એપલે પહેલીવાર બેઝલ-લેસ OLED ડિસ્પ્લે સાથે iPhone X લોન્ચ કર્યો હતો, ત્યારે તેની ડિમાન્ડ એટલી બધી હતી કે પ્રી-ઓર્ડર ખુલતાની સાથે જ મિનિટોમાં ફોન આઉટ ઓફ સ્ટોક થઈ ગયા હતા અને લોકોને ડિલિવરી માટે મહિનાઓ સુધી રાહ જોવી પડી હતી. આ વખતે પણ 'આઇફોન અલ્ટ્રા' ખરીદવા માટે ક્રેઝ એટલો જ ભયંકર રહેવાનો છે, કારણ કે સ્ટોક બજારની ડિમાન્ડ કરતા ઘણો ઓછો હશે.

કિંમત ભલે આસમાને હોય, પણ ફીચર્સ આપશે અલ્ટીમેટ અનુભવ

આ આઇફોન જ્યારે બંધ હશે ત્યારે સામાન્ય સ્માર્ટફોનની જેમ ૫.૫ ઇંચની સ્ક્રીન આપશે અને ખુલ્યા પછી તે ૭.૮ ઇંચના મિની ટેબ્લેટ એટલે કે આઇપેડ જેવો ભવ્ય અનુભવ આપશે. ટાઇટેનિયમ બોડી, એપલની નેક્સ્ટ જનરેશન A20 ચિપ અને અદભુત મલ્ટિટાસ્કિંગ ફિચર્સ આ પ્રીમિયમ કિંમતને પણ સાર્થક કરશે તેવું લાગી રહ્યું છે. જો તમે પણ એપલના આ પ્રથમ ફોલ્ડેબલ ગેજેટને પોતાના હાથમાં જોવા માંગો છો, તો તમારે ગ્લોબલ લોન્ચિંગના પ્રી-ઓર્ડર પર અત્યારથી જ ચાંપતી નજર રાખવી પડશે!