ગુજરાતમાં ઘર પર રૂફટોપ સોલાર સિસ્ટમ લગાવવા ઇચ્છતા પરિવારો માટે સબસિડી અંગે મહત્વપૂર્ણ જાહેરાત કરવામાં આવી છે. મુખ્યમંત્રી ભૂપેન્દ્ર પટેલની અધ્યક્ષતામાં મળેલી કેબિનેટ બેઠક બાદ રાજ્ય સરકારના પ્રવક્તા મંત્રી જીતુ વાઘાણીએ ‘પીએમ સૂર્ય ઘર: મુફ્ત બિજલી યોજના’ હેઠળ વધારાની રાજ્ય સબસિડીની માહિતી આપી હતી. આ સહાયથી પાત્ર પરિવારો માટે સોલાર સિસ્ટમ લગાવવાનો ખર્ચ ઘટવાની અપેક્ષા છે.
સામાન્ય વર્ગના પરિવારોને 10% અને SC/STને 5% ફાળો
જાહેરાત અનુસાર, 1 કિલોવોટ (kW) અને 2 કિલોવોટની રહેણાક રૂફટોપ સોલાર સિસ્ટમ માટે સામાન્ય વર્ગના પરિવારોને નિર્ધારિત બેન્ચમાર્ક ખર્ચના માત્ર 10% અને અનુસૂચિત જાતિ (SC) તથા અનુસૂચિત જનજાતિ (ST)ના પરિવારોને માત્ર 5% ફાળો આપવાનો રહેશે. બાકીના નિર્ધારિત ખર્ચમાં સરકારી સબસિડીનો ફાળો રહેશે. જોકે, વાસ્તવિક ખર્ચ સિસ્ટમના પ્રકાર, વેન્ડર અને લાગુ પડતી યોજનાની શરતો પ્રમાણે અલગ હોઈ શકે છે.
3 લાખથી વધુ પરિવારોને લાભ મળવાની અપેક્ષા
રાજ્ય સરકારના જણાવ્યા અનુસાર, આ વધારાની સબસિડીથી ગુજરાતના 3 લાખથી વધુ પરિવારોને લાભ મળવાની અપેક્ષા છે. આ સહાય માટે રાજ્ય સરકાર અંદાજે ₹1,000 કરોડનો વધારાનો ખર્ચ ઉઠાવશે. આ પગલાનો હેતુ વધુ પરિવારોને સોલાર ઊર્જા અપનાવવા પ્રોત્સાહિત કરવાનો અને પરંપરાગત વીજળી પરની નિર્ભરતા ઘટાડવાનો છે.
ગુજરાતમાં 8.5 લાખથી વધુ ઘરોમાં સોલાર સિસ્ટમ
રાજ્ય સરકારના જણાવ્યા અનુસાર, ‘પીએમ સૂર્ય ઘર: મુફ્ત બિજલી યોજના’ હેઠળ ગુજરાતમાં અત્યાર સુધીમાં 8.5 લાખથી વધુ ઘરોમાં રૂફટોપ સોલાર સિસ્ટમ સ્થાપિત કરવામાં આવી છે. સરકારના દાવા પ્રમાણે, આ ક્ષેત્રે ગુજરાત દેશમાં પ્રથમ સ્થાને છે. વધારાની સબસિડીથી સોલાર ઊર્જાનો વ્યાપ વધુ વધવાની આશા છે.
સોશિયલ મીડિયામાં અમારી સાથે જોડાવ