એશિયન ગેમ્સ 2026માં ભારતીય આર્ચરી ટીમે શાનદાર પ્રદર્શન કરતા કમ્પાઉન્ડ ઇવેન્ટમાં બે ગોલ્ડ મેડલ પોતાના નામે કર્યા છે. પ્રથમ મહિલા કમ્પાઉન્ડ ટીમે ગોલ્ડ જીત્યા બાદ ચિકિથા તનિપાર્થી અને સાહિલ જાધવની ભારતીય મિક્સ્ડ ટીમે પણ રોમાંચક મુકાબલામાં સુવર્ણ ચંદ્રક જીત્યો.
મહિલા કમ્પાઉન્ડ ટીમે ચીનને હરાવી ગોલ્ડ જીત્યો
મહિલા કમ્પાઉન્ડ ટીમની ફાઇનલમાં ભારતની ચિકિથા તનિપાર્થી, પ્રથિકા પ્રદીપ અને જ્યોતિ સુરેખા વેન્નમની ત્રિપુટીએ ચીન સામે શાનદાર પ્રદર્શન કર્યું. ભારતીય ટીમે ફાઇનલમાં ચીનને 238-234ના સ્કોરથી હરાવી ગોલ્ડ મેડલ જીત્યો.
આ જીત સાથે ભારતીય મહિલા કમ્પાઉન્ડ ટીમે એશિયન ગેમ્સમાં પોતાનું વર્ચસ્વ જાળવી રાખ્યું. રિપોર્ટ મુજબ ભારતની ટીમે આ પ્રદર્શન દરમિયાન વિશ્વ રેકોર્ડની બરાબરી પણ કરી હતી.
ચિકિથા અને સાહિલે મિક્સ્ડ ટીમમાં જીત્યું ગોલ્ડ
મહિલા ટીમની જીત બાદ ચિકિથા તનિપાર્થી અને સાહિલ જાધવની મિક્સ્ડ કમ્પાઉન્ડ ટીમે પણ ગોલ્ડ મેડલ જીત્યો. ફાઇનલમાં ભારતનો સામનો દક્ષિણ કોરિયા સામે થયો હતો.
મુકાબલો અત્યંત નજીક રહ્યો અને બંને ટીમો 157-157ના સ્કોર પર બરાબરી પર રહી હતી. ત્યારબાદ પરિણામ માટે શૂટ-ઓફ યોજાયો, જેમાં ભારતીય જોડીએ દબાણ વચ્ચે સચોટ નિશાન લગાવી દક્ષિણ કોરિયાને પાછળ છોડી ગોલ્ડ મેડલ પોતાના નામે કર્યો.
LA 2028 ઓલિમ્પિક્સ માટે ભારતને ક્વોટા
ચિકિથા તનિપાર્થી અને સાહિલ જાધવની આ જીતનું મહત્વ માત્ર એશિયન ગેમ્સના ગોલ્ડ મેડલ પૂરતું મર્યાદિત નથી. આ જીત સાથે ભારતે લૉસ એન્જલસ 2028 ઓલિમ્પિક્સના કમ્પાઉન્ડ મિક્સ્ડ ટીમ ઇવેન્ટ માટે ક્વોટા સ્થાન પણ મેળવ્યું છે. કમ્પાઉન્ડ મિક્સ્ડ ટીમ ઇવેન્ટ LA 2028માં પ્રથમ વખત ઓલિમ્પિક કાર્યક્રમનો ભાગ બનશે.
ભારતીય આર્ચરી માટે મહત્વપૂર્ણ દિવસ
એશિયન ગેમ્સ 2026માં કમ્પાઉન્ડ આર્ચરીમાં ભારતના આ બે ગોલ્ડ મેડલ ભારતીય તીરંદાજો માટે મહત્વપૂર્ણ સિદ્ધિ છે. મહિલા ટીમના ગોલ્ડ બાદ મિક્સ્ડ ટીમની રોમાંચક જીતે ભારતના મેડલ અભિયાનમાં વધુ એક સુવર્ણ ઉમેર્યું છે.
સોશિયલ મીડિયામાં અમારી સાથે જોડાવ