ભારતે ગ્લાસગોમાં યોજાઈ રહેલી કોમનવેલ્થ ગેમ્સ 2026માં શાનદાર પ્રદર્શન કરીને એક જ દિવસમાં છ મેડલ જીત્યા છે. જુડો અને એથ્લેટિક્સમાં મળેલી ઐતિહાસિક સફળતાના કારણે ભારતનો કુલ મેડલ આંક 23 પર પહોંચી ગયો છે. હાલમાં ભારતના ખાતામાં 5 ગોલ્ડ, 12 સિલ્વર અને 6 બ્રોન્ઝ મેડલ છે, જ્યારે બોક્સિંગમાં હજુ અનેક ગોલ્ડ જીતવાની તક બાકી હોવાથી મેડલ સંખ્યામાં વધુ વધારો થવાની આશા છે.
ભારત માટે સૌથી મોટી ખુશખબર જુડોમાંથી આવી હતી. ત્રિપુરાની 23 વર્ષની અસ્મિતા દેએ મહિલા 48 કિગ્રા વર્ગમાં કેનેડાની હાઈડી ક્વાચને હરાવીને ભારતને કોમનવેલ્થ ગેમ્સના ઇતિહાસનો પ્રથમ જુડો ગોલ્ડ અપાવ્યો. પિતાના નિધનના માત્ર સાત મહિનામાં મળેલી આ સિદ્ધિ સમગ્ર દેશ માટે પ્રેરણારૂપ બની છે. બીજી તરફ હર્ષ સિંહે પુરુષ જુડોમાં ગોલ્ડ જીતીને કોમનવેલ્થ ગેમ્સમાં ગોલ્ડ જીતનાર પ્રથમ ભારતીય પુરુષ જુડોકા બનવાનો ગૌરવ મેળવ્યો. યામિની મૌર્યએ મહિલા 57 કિગ્રા વર્ગમાં સિલ્વર મેડલ જીતીને ભારતની સફળતા વધુ મજબૂત બનાવી.
એથ્લેટિક્સમાં પણ ભારતે યાદગાર પ્રદર્શન કર્યું. ઓલિમ્પિક ચેમ્પિયન નીરજ ચોપરાએ 85.83 મીટરના શ્રેષ્ઠ થ્રો સાથે સિલ્વર મેડલ જીત્યો, જ્યારે યશવીર સિંહે વ્યક્તિગત શ્રેષ્ઠ 85.41 મીટરના થ્રો સાથે બ્રોન્ઝ મેડલ મેળવી ભારતને જેવલિન થ્રોમાં ડબલ પોડિયમ અપાવ્યું. ડેકાથ્લોનમાં તેજસ્વિન શંકરે ઐતિહાસિક બ્રોન્ઝ મેડલ જીતીને ભારતની મેડલ ઝુંબેશને વધુ ગતિ આપી.
હવે તમામની નજર બોક્સિંગ પર છે, જ્યાં ભારતના 10 બોક્સર ગોલ્ડ મેડલ માટે રિંગમાં ઉતરવાના છે. લવલીના બોર્ગોહેન સહિતના ભારતીય ખેલાડીઓ પાસેથી વધુ ગોલ્ડની અપેક્ષા છે. જો ભારતીય બોક્સરો અપેક્ષા મુજબ પ્રદર્શન કરશે તો ભારતની મેડલ સંખ્યા અને મેડલ ટેબલમાં સ્થાન બંનેમાં નોંધપાત્ર સુધારો થઈ શકે છે.
સોશિયલ મીડિયામાં અમારી સાથે જોડાવ