આર્ટિફિશિયલ ઇન્ટેલિજન્સ (AI) ક્ષેત્રની અગ્રણી કંપની Anthropicએ તેના લોકપ્રિય AI ચેટબોટ Claude AI માટે ભારતમાં ભારતીય રૂપિયા (₹)માં સબ્સ્ક્રિપ્શન કિંમત રજૂ કરવાનું શરૂ કર્યું છે. કંપનીની વેબસાઇટ અને મોબાઇલ એપ પર કેટલાક યુઝર્સને હવે નવી ભારતીય કિંમતો જોવા મળી રહી છે.

આ પગલું ભારત જેવા ઝડપથી વિકસતા AI બજારને ધ્યાનમાં રાખીને લેવામાં આવ્યું છે. ભારતમાં ડેવલપર્સ, વિદ્યાર્થીઓ અને બિઝનેસ દ્વારા જનરેટિવ AI ટૂલ્સનો ઉપયોગ સતત વધી રહ્યો છે. કંપનીના જણાવ્યા મુજબ, અમેરિકા પછી ભારત Claude AIનું બીજું સૌથી મોટું બજાર છે, જ્યાંથી Claudeના કુલ વૈશ્વિક ઉપયોગમાં આશરે 5.8 ટકા હિસ્સો આવે છે.

Claude AIના નવા ભારતીય પ્લાન અને કિંમત

ભારતમાં Claude AI માટે કંપનીએ અલગ-અલગ સબ્સ્ક્રિપ્શન પ્લાન રજૂ કર્યા છે.

  • Claude Pro – માસિક બિલિંગ માટે ₹2,399 પ્રતિ મહિનો, જ્યારે વાર્ષિક બિલિંગ પસંદ કરવાથી અસરકારક કિંમત આશરે ₹2,000 (₹1,999) પ્રતિ મહિનો થાય છે.
  • Claude Max – ₹11,999 પ્રતિ મહિનોથી શરૂ.
  • Claude Team – ₹2,399 પ્રતિ યુઝર પ્રતિ મહિનોથી શરૂ.

તુલનાત્મક રીતે અમેરિકામાં Claude Proની કિંમત 17 ડોલર પ્રતિ મહિનો અને Claude Maxની શરૂઆત 100 ડોલર પ્રતિ મહિનોથી થાય છે.

હાલમાં UPI દ્વારા ચુકવણી ઉપલબ્ધ નથી

કંપનીએ હજુ સુધી UPI (Unified Payments Interface) દ્વારા પેમેન્ટની સુવિધા શરૂ કરી નથી. હાલમાં ભારતીય ગ્રાહકો ક્રેડિટ કાર્ડ, ડેબિટ કાર્ડ અથવા Apple App Store અને Google Play Storeના બિલિંગ સિસ્ટમ દ્વારા સબ્સ્ક્રિપ્શન ખરીદી શકે છે.

ભારતમાં Anthropicનું વિસ્તરતું નેટવર્ક

Anthropicએ આ વર્ષે બેંગલુરુમાં પોતાની ઓફિસ શરૂ કરી છે અને Microsoft Indiaના ભૂતપૂર્વ મેનેજિંગ ડિરેક્ટર Irina Ghoseને ભારતના બિઝનેસનું નેતૃત્વ સોંપ્યું છે.

કંપનીએ ભારતમાં એન્ટરપ્રાઇઝ AI સોલ્યુશન્સને વધુ વેગ આપવા માટે Infosys અને Tata Consultancy Services (TCS) સાથે પણ ભાગીદારી કરી છે.

Claude Fable 5ની મફત ઓફર 19 જુલાઈ સુધી લંબાઈ

Anthropicએ Claude Fable 5 માટેની પ્રમોશનલ ઓફર પણ વધારી છે. અગાઉ આ ઓફર 12 જુલાઈ સુધી હતી, પરંતુ હવે તેને 19 જુલાઈ, 2026 સુધી લંબાવવામાં આવી છે.

પ્રમોશનલ સમયગાળા દરમિયાન Pro, Max, Team અને Enterprise પ્લાનના યુઝર્સ કોઈ વધારાના ખર્ચ વિના તેમના સાપ્તાહિક સબ્સ્ક્રિપ્શન લિમિટના 50 ટકા સુધી Claude Fable 5નો ઉપયોગ કરી શકશે.

કંપનીએ પોતાના સપોર્ટ દસ્તાવેજમાં જણાવ્યું છે કે 19 જુલાઈ, 2026 (રાત્રે 11:59:59 PM PT) સુધી આ ઓફર અને વધારેલી સાપ્તાહિક ઉપયોગ મર્યાદા બંને ચાલુ રહેશે.