ગુજરાતમાં સાર્વત્રિક મેઘમહેર: ૨૪ કલાકમાં ૧૧૯ તાલુકા ભીંજાયા, ખુશહાલ વાતાવરણ.

રાજ્યમાં મધ્ય અને દક્ષિણ ગુજરાત સહિતના વિસ્તારોમાં હળવાથી ભારે વરસાદી માહોલ જામ્યો છે. છેલ્લા ૨૪ કલાક દરમિયાન (૧૨ ઓગસ્ટ સવારે ૬ વાગ્યા સુધી) રાજ્યના ૧૧૯ તાલુકાઓમાં મેઘમહેર નોંધાઈ છે. સ્ટેટ ઇમરજન્સી ઓપરેશન સેન્ટર (SEOC)ના આંકડા અનુસાર, પંચમહાલના શહેરા તાલુકામાં સૌથી વધુ ૫.૪૩ ઇંચ જેટલો ભારે વરસાદ ખાબક્યો છે. આ ઉપરાંત, ૧૨ ઓગસ્ટે સવારે ૬થી ૮ વાગ્યાના માત્ર બે કલાકમાં જ ૪૮ તાલુકામાં વરસાદ નોંધાયો હતો, જેમાં નર્મદાના દેડિયાપાડામાં સૌથી વધુ ૧ ઇંચથી વધુ પાણી વરસી ગયું હતું.

મધ્ય અને દક્ષિણ ગુજરાતના વિસ્તારોમાં મેઘરાજાએ જમાવટ કરી છે. પંચમહાલના શહેરામાં સવારે ૮થી ૧૨ વાગ્યાના માત્ર ૪ કલાકના ટૂંકા ગાળામાં જ ૪.૫ ઇંચ મુસળધાર વરસાદ પડી જતાં નીચાણવાળા માર્ગો પર પાણી ફરી વળ્યા હતા. આ સિવાય મહીસાગરના કોઠંબામાં ૫.૨૪ ઇંચ વરસાદ ખાબક્યો હતો, જ્યારે તાપી જિલ્લાના નિઝરમાં મોડી રાત્રે ૨ વાગ્યા પછી વીજળીના કડાકા-ભડાકા સાથે ૩.૩૯ ઇંચ વરસાદ નોંધાયો હતો.

છેલ્લા ૨૪ કલાકમાં નોંધાયેલો મુખ્ય વરસાદ:

જાહેરાત

• પંચમહાલ: શહેરામાં ૫.૪૩ ઇંચ, ગોધરામાં ૧.૭૩ ઇંચ, મોરવા હડફમાં ૧.૧૦ ઇંચ

• મહીસાગર: કોઠંબામાં ૫.૨૪ ઇંચ, લુણાવાડામાં ૨.૭૨ ઇંચ, ગોધરમાં ૧.૭૩ ઇંચ

• તાપી: નિઝરમાં ૩.૩૯ ઇંચ, કુકરમુંડામાં ૨.૬૮ ઇંચ

• ખેડા & ખેડા સરહદ: બાલાસિનોરમાં ૨.૫૨ ઇંચ, કપડવંજમાં ૧.૪૬ ઇંચ

• નર્મદા: નાંદોદમાં ૨.૪૮ ઇંચ, સાગબારામાં ૧.૮૯ ઇંચ, દેડિયાપાડામાં ૧.૩૪ ઇંચ, ગરૂડેશ્વરમાં ૧.૦૬ ઇંચ

• ગાંધીનગર: દેહગામમાં ૨.૦૯ ઇંચ

• વલસાડ: ઉમરગામમાં ૨.૦૫ ઇંચ, નાનાપોંઢામાં ૧.૫૦ ઇંચ

૧થી ૨ ઇંચ વચ્ચે વરસાદ ધરાવતા અન્ય વિસ્તારો: દાહોદ જિલ્લામાં ગોવિંદ ગુરુ લીમડી (૧.૯૩ ઇંચ), સુખસર (૧.૮૫ ઇંચ), દાહોદ શહેર (૧.૫૭ ઇંચ), ગરબાડા (૧.૪૨ ઇંચ), સંજેલી (૧.૩૮ ઇંચ) અને સિંગવડ (૧.૧૪ ઇંચ)માં નોંધપાત્ર વરસાદ થયો છે. આ સિવાય ડાંગના વઘઈમાં ૧.૮૫ ઇંચ અને આહવામાં ૧.૫૪ ઇંચ તેમજ છોટાઉદેપુરના બોડેલીમાં ૧.૩૮ ઇંચ વરસાદ નોંધાયો છે.