ભારતીય મહિલા ક્રિકેટ ટીમમાં મોટો નેતૃત્વ ફેરફાર થયો છે. BCCIએ સ્મૃતિ મંધાનાને ભારતીય મહિલા ક્રિકેટ ટીમની ફુલ-ટાઇમ વ્હાઇટ-બોલ કેપ્ટન તરીકે નિયુક્ત કરી છે. આ નિર્ણય હરમનપ્રીત કૌરે તમામ ફોર્મેટની કેપ્ટનશિપમાંથી રાજીનામું આપ્યા બાદ લેવામાં આવ્યો છે. BCCIએ 6 ઓક્ટોબર 2026ના રોજ મંધાનાની કેપ્ટન તરીકે નિમણૂકની જાહેરાત કરી હતી.
18 T20I અને 4 ODIમાં કરી ચૂકી છે કેપ્ટનશિપ
સ્મૃતિ મંધાના 2013થી ભારતીય ટીમનો ભાગ છે અને લાંબા સમયથી ટીમમાં મહત્વની ભૂમિકા ભજવી રહી છે. ફુલ-ટાઇમ કેપ્ટન બનતા પહેલાં તે ભારત માટે 18 T20I અને 4 ODIમાં કેપ્ટનશિપ કરી ચૂકી છે. તે હરમનપ્રીત કૌરની ડેપ્યુટી પણ રહી ચૂકી છે.
મંધાનાએ મહિલા પ્રીમિયર લીગમાં પણ કેપ્ટન તરીકે પોતાની આગેવાનીનો અનુભવ મેળવ્યો છે. તેની કેપ્ટનશિપ હેઠળ રોયલ ચેલેન્જર્સ બેંગલુરુએ 2024 અને 2026માં WPL ટાઇટલ જીત્યા હતા.
હરમનપ્રીત કૌર ખેલાડી તરીકે ચાલુ રહેશે
હરમનપ્રીત કૌરે 6 ઓક્ટોબરે ભારતીય મહિલા ટીમની ત્રણેય ફોર્મેટની કેપ્ટનશિપ છોડી છે. જોકે તે ભારતીય ટીમ માટે ખેલાડી તરીકે રમવાનું ચાલુ રાખશે. BCCIએ તેની લાંબી કેપ્ટનશિપ અને ભારતીય મહિલા ક્રિકેટમાં આપેલા યોગદાનને પણ બિરદાવ્યું છે.
હરમનપ્રીતની કેપ્ટનશિપમાં ભારતે 2025માં પ્રથમ વખત મહિલા ODI વર્લ્ડ કપનો ખિતાબ જીત્યો હતો. તાજેતરમાં તેની આગેવાનીમાં ભારતે 2026 એશિયન ગેમ્સમાં પણ ગોલ્ડ મેડલ જીત્યો હતો.
ઝિમ્બાબ્વે સિરીઝથી નવી જવાબદારીની શરૂઆત
સ્મૃતિ મંધાનાની ફુલ-ટાઇમ કેપ્ટન તરીકેની શરૂઆત ભારતની આગામી ઝિમ્બાબ્વે સામેની T20I અને ODI સિરીઝથી થશે. BCCIએ જાહેર કરેલી ટીમમાં મંધાનાને કેપ્ટન બનાવવામાં આવી છે. T20Iમાં શેફાલી વર્મા અને ODIમાં દીપ્તિ શર્માને વાઇસ-કેપ્ટનની જવાબદારી સોંપવામાં આવી છે.
સોશિયલ મીડિયામાં અમારી સાથે જોડાવ