સંસદના ચોમાસુ સત્ર દરમિયાન સોમવારે કેન્દ્ર સરકારે ન્યાયતંત્ર અને સૂક્ષ્મ, લઘુ અને મધ્યમ ઉદ્યોગો (MSME) સાથે જોડાયેલા બે મહત્વપૂર્ણ બિલોને આગળ ધપાવ્યા. લોકસભાએ સુપ્રીમ કોર્ટમાં જજોની સંખ્યા વધારવા માટેનું સુપ્રીમ કોર્ટ (જજોની સંખ્યા) સંશોધન બિલ, 2026 પસાર કર્યું, જ્યારે રાજ્યસભાએ MSME ડેવલપમેન્ટ (સંશોધન) બિલ, 2026ને મંજૂરી આપી.
સુપ્રીમ કોર્ટમાં વધશે જજોની સંખ્યા
લોકસભામાં પસાર થયેલા બિલ મુજબ હવે ભારતના સુપ્રીમ કોર્ટમાં મુખ્ય ન્યાયાધીશ (Chief Justice of India) સિવાયના જજોની મંજૂર સંખ્યા 33માંથી વધારીને 37 કરવામાં આવશે. એટલે કે મુખ્ય ન્યાયાધીશ સહિત સુપ્રીમ કોર્ટમાં કુલ મંજૂર જજોની સંખ્યા 38 થશે.
કેન્દ્ર સરકારનું માનવું છે કે સુપ્રીમ કોર્ટમાં સતત વધતા કેસોના ભારને ધ્યાનમાં રાખીને જજોની સંખ્યા વધારવાની જરૂરિયાત ઉભી થઈ છે. વધારાના જજોની નિમણૂકથી કેસોના ઝડપી નિકાલમાં મદદ મળશે અને ન્યાયિક પ્રક્રિયા વધુ અસરકારક બનશે.
MSME માટે ચુકવણી વિવાદોના ઝડપી ઉકેલ પર ભાર
બીજી તરફ રાજ્યસભાએ MSME ડેવલપમેન્ટ (સંશોધન) બિલ, 2026ને મંજૂરી આપી. આ બિલનો મુખ્ય ઉદ્દેશ MSME ક્ષેત્રના ઉદ્યોગોને સમયસર ચૂકવણી સુનિશ્ચિત કરવી અને ચૂકવણી સંબંધિત વિવાદોના ઝડપી નિરાકરણ માટે કાયદાકીય વ્યવસ્થાને વધુ મજબૂત બનાવવાનો છે.
સરકારના જણાવ્યા અનુસાર MSME દેશના અર્થતંત્રનો મહત્વપૂર્ણ આધારસ્તંભ છે. નાના અને મધ્યમ ઉદ્યોગોને સમયસર નાણાં મળતા રહે તે માટે આ સુધારા જરૂરી માનવામાં આવ્યા છે.
અર્થતંત્ર અને ન્યાયતંત્ર માટે મહત્વપૂર્ણ પગલું
એક તરફ સુપ્રીમ કોર્ટમાં જજોની સંખ્યા વધારવાનો નિર્ણય ન્યાયતંત્રની કાર્યક્ષમતા વધારવામાં મદદરૂપ બનશે, તો બીજી તરફ MSME સંશોધન બિલ નાના ઉદ્યોગોને નાણાકીય પ્રવાહ જાળવવામાં અને વ્યવસાયિક વિવાદોના ઝડપી ઉકેલમાં સહાયરૂપ બનશે.
સોશિયલ મીડિયામાં અમારી સાથે જોડાવ