ઇલોન મસ્કની કંપની સ્પેસએક્સ ઓગસ્ટ મહિનામાં સ્ટારશિપના 14મા ટેસ્ટ ફ્લાઇટ દ્વારા એક મહત્વપૂર્ણ માઇલસ્ટોન હાંસલ કરવાની તૈયારીમાં છે. કંપનીની યોજના મુજબ ઓગસ્ટ પૂર્ણ થાય તે પહેલાં આ ટેસ્ટ હાથ ધરવામાં આવશે. આ ફ્લાઇટ દરમિયાન લોન્ચ ટાવરની મદદથી સ્ટારશિપના ઉપલા ભાગ ‘શિપ’ને હવામાં જ પકડવાનો પ્રયાસ કરવામાં આવશે, જેને સ્પેસ ટેક્નોલોજીના ક્ષેત્રમાં મોટું પગલું માનવામાં આવી રહ્યું છે.
સ્ટારશિપ સિસ્ટમમાં ઉપરનો ભાગ સ્ટારશિપ સ્પેસક્રાફ્ટ અને નીચેનો ભાગ સુપર હેવી બૂસ્ટરનો સમાવેશ થાય છે. બંનેને મળીને ‘સ્ટારશિપ’ કહેવાય છે. સમગ્ર વાહનની ઊંચાઈ આશરે 403 ફૂટ છે, જ્યારે માત્ર ઉપરનો ‘શિપ’ ભાગ 171 ફૂટ ઊંચો છે.
સાઉથ ટેક્સાસ સ્થિત સ્ટારબેઝ ખાતે બે વિશાળ લોન્ચ ટાવર બનાવવામાં આવ્યા છે, જેમાં ‘ચોપસ્ટિક’ તરીકે ઓળખાતા મિકેનિકલ આર્મ્સ લગાવવામાં આવ્યા છે. આ આર્મ્સનો ઉપયોગ સ્ટારશિપને લોન્ચ પેડ પર એસેમ્બલ કરવા માટે થાય છે. હવે એ જ ટાવરની મદદથી શિપને હવામાં પકડવાની તૈયારી કરવામાં આવી રહી છે.
સ્પેસએક્સ અગાઉ ટેસ્ટ ફ્લાઇટ દરમિયાન સ્ટારશિપના નીચલા ભાગ સુપર હેવી બૂસ્ટરને સફળતાપૂર્વક પકડી ચૂકી છે, પરંતુ ઉપરના શિપ ભાગ માટે આ પહેલો પ્રયાસ હશે. જો આ પ્રયોગ સફળ રહેશે તો પુનઃઉપયોગી અવકાશયાનોના વિકાસમાં મહત્વપૂર્ણ પ્રગતિ ગણાશે.
ફ્લાઇટ-14 દરમિયાન સ્ટારલિંક V3 સેટેલાઇટ્સનો નવો બેચ પણ અવકાશમાં મોકલવામાં આવશે. આ સેટેલાઇટ્સ હાલના મોડેલ કરતાં વધુ મોટા અને વધુ ક્ષમતા ધરાવતા છે. 24 જુલાઈએ યોજાયેલી ફ્લાઇટ-13માં 20 સ્ટારલિંક V3 સેટેલાઇટ્સને સબ-ઓર્બિટલ માર્ગ પર મોકલવામાં આવ્યા હતા, જ્યારે આગામી ફ્લાઇટમાં તેમને કાર્યરત ઓર્બિટમાં સ્થાપિત કરવાની યોજના છે.
24 જુલાઈએ થયેલી ફ્લાઇટ-13 સ્પેસએક્સ માટે આત્મવિશ્વાસ વધારનારી સાબિત થઈ હતી. આ સબ-ઓર્બિટલ ઉડાન બાદ શિપને હિંદ મહાસાગરમાં ઉતારવામાં આવી હતી. ઇલોન મસ્કના જણાવ્યા મુજબ પૃથ્વીના વાતાવરણમાં પાછા ફરતી વખતે શિપની હીટ શીલ્ડ સંપૂર્ણપણે સુરક્ષિત રહી હતી અને સમગ્ર વાહન સારી સ્થિતિમાં હતું. હીટ શીલ્ડની સફળતાએ જ કંપનીને હવે ટાવર કેચ જેવી વધુ જોખમી પ્રક્રિયા અજમાવવાનો વિશ્વાસ આપ્યો છે.
સ્પેસએક્સના તાજેતરના અર્નિંગ્સ કોલ દરમિયાન ઇલોન મસ્કે જણાવ્યું હતું કે હીટ શીલ્ડ સંબંધિત મુખ્ય સમસ્યાઓ હવે મોટા ભાગે ઉકેલાઈ ગઈ હોવાનું તેમને લાગે છે. તેમણે ઉમેર્યું કે કંપની આગામી સમયમાં સ્ટારશિપ ફ્લાઇટ્સની આવર્તન ઝડપથી વધારવા માંગે છે.
મસ્કના જણાવ્યા પ્રમાણે, જો વિકાસની ગતિ યથાવત રહેશે તો આશરે એક વર્ષ પછી સ્પેસએક્સ દરરોજ ઓછામાં ઓછી એક સ્ટારશિપ ફ્લાઇટ ચલાવવા સક્ષમ બની શકે છે, અને ભવિષ્યમાં આ સંખ્યા વધુ પણ થઈ શકે છે.
અવકાશમાંથી પૃથ્વીના વાતાવરણમાં પાછા પ્રવેશતી વખતે સ્પેસક્રાફ્ટને હવાના ઘર્ષણને કારણે અત્યંત ઊંચું તાપમાન સહન કરવું પડે છે. આથી તેના બાહ્ય ભાગ પર વિશેષ રક્ષણાત્મક સ્તર, એટલે કે હીટ શીલ્ડ લગાવવામાં આવે છે. આ સ્તર અંદરના ભાગોને બળવાથી બચાવે છે અને સ્ટારશિપને ફરીથી ઉપયોગમાં લેવા માટે હીટ શીલ્ડનું સુરક્ષિત રહેવું અત્યંત જરૂરી માનવામાં આવે છે.
સોશિયલ મીડિયામાં અમારી સાથે જોડાવ