જામનગરમાં દિવાળીના પર્વને લઈને બજારોમાં ખરીદીનો માહોલ જામ્યો છે. ત્યારે શહેરના દિવ્યાંગ બાળકો પણ પોતાની કળા અને મહેનતથી તહેવારને ખાસ બનાવી રહ્યા છે. જામનગરની ‘ૐ ટ્રેનિંગ સેન્ટર’ સંસ્થા દ્વારા દિવ્યાંગ બાળકોને આત્મનિર્ભર બનાવવાના હેતુથી અનોખી પહેલ કરવામાં આવી છે. સંસ્થાના બાળકોએ છેલ્લા ચાર મહિનાની મહેનત અને તાલીમથી અંદાજે 7,000 જેટલા સુંદર અને આકર્ષક દીવાઓ તૈયાર કર્યા છે.
ચાર મહિનાની મહેનતથી તૈયાર કર્યા વિવિધ ડિઝાઇનના દીવા
‘ૐ ટ્રેનિંગ સેન્ટર’ છેલ્લા 15 વર્ષથી મનોદિવ્યાંગ બાળકોના શિક્ષણ, તાલીમ અને સર્વાંગી વિકાસ માટે કાર્યરત છે. દિવાળીના તહેવારને ધ્યાનમાં રાખીને સંસ્થા દ્વારા બાળકોને દીવા બનાવવાની વિશેષ તાલીમ આપવામાં આવી હતી.
આ કામગીરી દરમિયાન બાળકોએ સાથિયાવાળા, કુંડીવાળા, મીણ પૂરેલા, મીણ વગરના તેમજ મટુકી આકારના વિવિધ પ્રકારના દીવા તૈયાર કર્યા છે. બાળકોએ પોતાની આવડત અને સર્જનાત્મકતાનો ઉપયોગ કરીને દીવાઓને સુંદર રંગો અને આકર્ષક સજાવટથી નવું રૂપ આપ્યું છે. અંદાજે 7,000 જેટલા દીવા તૈયાર કરીને વેચાણ માટે મૂકવામાં આવ્યા છે.
દિવ્યાંગ બાળકોના હાથે તૈયાર થયેલા દીવા ખરીદવા અપીલ
બાળકોની ચાર મહિનાની મહેનતને યોગ્ય પ્રોત્સાહન મળે અને તેમની કળાને પ્રોત્સાહન મળે તે હેતુથી સંસ્થા દ્વારા જામનગરના નાગરિકોને ખાસ અપીલ કરવામાં આવી છે. દિવાળીની ખરીદી દરમિયાન બજારમાંથી અન્ય વસ્તુઓની સાથે આ બાળકો દ્વારા તૈયાર કરવામાં આવેલા દીવાઓને પણ પ્રાથમિકતા આપવા જણાવાયું છે.
આ દીવાઓની ખરીદી માત્ર તહેવારની જરૂરિયાત પૂરી કરવા પૂરતી નથી, પરંતુ બાળકોની મહેનતને બિરદાવવાનો અને તેમનામાં આત્મવિશ્વાસ વધારવાનો એક પ્રયાસ પણ છે. આવી પ્રવૃત્તિઓ દ્વારા બાળકોને પોતાની ક્ષમતા ઓળખવાની અને સ્વાવલંબન તરફ આગળ વધવાની તક મળે છે.
એક દીવાની ખરીદીથી બાળકોને મળશે પ્રોત્સાહન
દિવાળી પ્રકાશ અને ખુશીઓનો તહેવાર છે. આ પર્વે દરેક વ્યક્તિ પોતાના ઘરને દીવાઓથી રોશન કરે છે. ત્યારે આ વર્ષે દિવ્યાંગ બાળકોના હાથે તૈયાર થયેલો એક દીવો ખરીદીને તેમના જીવનમાં પણ ખુશીનો પ્રકાશ પાથરી શકાય છે.
જામનગરના નાગરિકો આ પહેલમાં સહભાગી બનીને બાળકોની મહેનતને પ્રોત્સાહન આપે તેવી સંસ્થા દ્વારા અપીલ કરવામાં આવી છે. સમાજના સહકારથી આવા બાળકોને પોતાની આવડત દર્શાવવા અને આત્મનિર્ભર બનવા માટે વધુ પ્રેરણા મળી શકે છે.
સોશિયલ મીડિયામાં અમારી સાથે જોડાવ