જુલાઈની શરૂઆતમાં જ મેઘરાજાની ધમાકેદાર એન્ટ્રી,જુલાઈના પ્રારંભે ખરીફ વાવણીની કામગીરીમાં ભારે વેગ, ખેડૂતોમાં ખુશી

જેની ચાતક નજરે આખું વર્ષ રાહ જોવાય છે, તેવા અષાઢી મેઘાએ આખરે ધરતીપુત્રોના હૈયા ઠાર્યા છે. જૂન મહિનાના અંતમાં થોડી રાહ જોવડાવ્યા બાદ, જુલાઈના પ્રારંભે જ સમગ્ર રાજ્યમાં ચોમાસુ પૂર્ણ રૂપે સક્રિય બન્યું છે. આકાશેથી વરસેલા કાચા સોનાએ ખેડૂતોના ચહેરા પર સ્મિત લાવી દીધું છે. સાર્વત્રિક વરસાદના પગલે ગુજરાતભરમાં ખરીફ પાકની વાવણીની કામગીરીએ રોકેટ ગતિ પકડી છે. ટ્રેક્ટરોની ઘરઘરાટી અને કાદવ-કીચડ વચ્ચે પણ હસતા મુખે વાવણી કરતા ખેડૂતોના દ્રશ્યો ગ્રામીણ વિસ્તારોમાં એક નવી આશાનો સંચાર કરી રહ્યા છે.

ખેતીવાડી વિભાગના પ્રાથમિક અહેવાલો મુજબ, જુલાઈના પ્રથમ સપ્તાહમાં જ વાવણીનો ગ્રાફ આશ્ચર્યજનક રીતે ઉપર ગયો છે. ગત વર્ષની સરખામણીએ આ વર્ષે શરૂઆતી તબક્કો ખૂબ જ પ્રોત્સાહક જોવા મળી રહ્યો છે.

ધરતીપુત્રોના હૈયામાં હરખની હેલી: "આ વર્ષે મોલાત સોના જેવી પાકશે"

જૂન મહિનામાં વરસાદ ખેંચાતા ખેડૂતોના જીવ તાળવે ચોંટ્યા હતા, પરંતુ જુલાઈ બેસતા જ કુદરત મહેરબાન થઈ છે. જમીનમાં પૂરતો ભેજ આવી જતાં બિયારણનો ઉગાવો ખૂબ જ સારો થવાની આશા છે.