જાપાનના આઈચી-નાગોયામાં યોજાયેલી એશિયન ગેમ્સ 2026માં ભારતે શાનદાર પ્રદર્શન સાથે કુલ 85 મેડલ જીતીને મેડલ ટેલીમાં ચોથું સ્થાન મેળવ્યું છે. ભારતીય ખેલાડીઓએ વિવિધ રમતોમાં મજબૂત પ્રદર્શન કરતા 21 ગોલ્ડ, 27 સિલ્વર અને 37 બ્રોન્ઝ મેડલ પોતાના નામે કર્યા છે.
ભારતના કુલ 85 મેડલમાં 21 ગોલ્ડ મેડલનો સમાવેશ થાય છે. ક્રિકેટ, હોકી અને કબડ્ડી સહિતની રમતોમાં ભારતે ગોલ્ડ મેડલ જીત્યા હતા. આ ઉપરાંત શૂટિંગ, એથ્લેટિક્સ, બોક્સિંગ, આર્ચરી અને અન્ય રમતોમાં પણ ભારતીય ખેલાડીઓએ મેડલ જીત્યા હતા.
મેડલ ટેલીમાં ચીન પ્રથમ ક્રમે રહ્યું છે. ચીને કુલ 341 મેડલ જીત્યા છે. જ્યારે જાપાન 269 મેડલ સાથે બીજા અને દક્ષિણ કોરિયા 150 મેડલ સાથે ત્રીજા ક્રમે રહ્યું છે. ભારત 85 મેડલ સાથે ચોથા સ્થાને રહ્યું.
ભારત માટે આ એશિયન ગેમ્સમાં ટીમ સ્પોર્ટ્સનું પ્રદર્શન ખાસ નોંધપાત્ર રહ્યું. ક્રિકેટ, હોકી અને કબડ્ડીમાં ભારતીય ટીમોએ ગોલ્ડ મેડલ મેળવી દેશની મેડલ ટેલીમાં મહત્વનો ફાળો આપ્યો.
જોકે, 2022માં હાંગઝોઉ ખાતે યોજાયેલી એશિયન ગેમ્સમાં ભારતે રેકોર્ડ 106 મેડલ જીત્યા હતા. તેની સરખામણીમાં 2026માં ભારતના મેડલની સંખ્યા ઓછી રહી છે, પરંતુ 21 ગોલ્ડ મેડલ સાથે ભારતે ટોચના દેશોમાં પોતાનું સ્થાન જાળવી રાખ્યું છે.
સોશિયલ મીડિયામાં અમારી સાથે જોડાવ